قواعد مقابلة العريس الأربعون
1_متحطيش ميك اب وتداري لون بشرتك الحقيقي
2_متلبسيش لانسيز عشان يفكرك اجنبية ويوم الفرح يجيله سكتة قلبية من شكلك ...
3_متلبسيش ضيق ، كل عيوب جسمك الضيق هيظهرها اكتر، البسي واسع ده حتى #حشمة
4_بلاش الألوان اللي بتنور ، ولا بطيخي ولا احمر ولا فسفوري هتغمقك وهتبقي شبه عروسة المولد ،
5_ خليكي في الألوان الغامقة لو انتي كنزة حبتين ،ولو انتي رفيعة حلو الروزات بتتخن ...
6_سنانك وكمان مرة سنانك اغسليهم جامد، عشان الضحكة تنور وشك ...
7_متفتحيش الباب اما يخبط، ده دور اخوكي او والدك ...
8_اشربي ليمون او اي عصير فريش عشان متبقيش متوترة وخايفة ...
9_صلي ركعتين حاجة لله، وادعي ربنا يجعل فيه الخير ...
10_بعد ما تصلي متحطيش ميك اب، خليكي على طبيعتك ارجوكي ...
11_البسي شراب وحذاء في رجلك، رجليكي من ضمن العورة ...
12_متسمعيش كلام حد وتحطي كحل وروج، مش دول اللي هيوقعوا العريس ...
13_العريس اما يجي متطلعيش على طول من نفسك لازم حد من اهلك يندهلك، عززي نفسك ياحبيبتي يقول علينا ايه الراجل ماصدقتي قفشتي واحد ...
14_ادخلي المطبخ وابدأي حضري واجب الضيافة، تنضفي الكاسات والإطباق كويس، وتنشفيهم من المياه، الراجل مش جاي يستحما عندكم ...
15_ اول ما بابا يندهلك، تشيلي الصينية وتطلعي قولي السلام عليكم ...
16_حماكي يقول ماشاء الله، قولي شكراً، حماتك تقول عسل قولي ربنا يخليكي، الكلمة الطيبة صدقة ...
17_ هتقدمي من الكبير للصغير، يعني تبدأي بحماكي وبعدين حماتك ،وبباكي ومامتك ،وبعد كده اخوات العريس وفي الآخر هو ...
18_حطي الصينية بالراحة ،وروحي لأقرب كرسي قدام العريس واستقري ...
19_اوعي راجل يمدلك ايده وتسلمي ،هيتحرج؟ اعتذري بأدب انك مبتسلميش على رجالة، ولو اتحرج واحد الباقيين مش هيمعملوها، البنت المحترمة اللي عارفة دينها مبتسلمش على رجالة ...
20_قعدتي واستقريتي، والعريس قدامك بصي عليه، شوفيه ده جواز ومستقبل ياحبيبتي انتم مش طالعين رحلة شرم اسبوع وراجعين، واول مقابلة بتبقى تعارف ورؤية شرعية واخدة بالك من رؤية دي ...
21_بصي على ضوافره واسنانه، لو بيصلي هيظهر عليهم النضافة والبياض من كثرة الوضوء ...
22_ متبصيش على هدومه، ومتاخديش بالمظهر فيه رجالة مش مهندمين لإنهم جادين وعصاميين ...
23_ متبصيش في ساعتك ابداً، متحسسهوش انك مستتقلة المقابلة ...
24_ متحطيش رجل على رجل، احترمي الناس الكبيرة، وزوج المستقبل ...
25_متهزيش رجلك، ده علامة على توترك ...
26_ متقرقضيش ضوافرك، انتي مش في امتحان شفوي في المدرسة وخايفة متسمعيش ...
27_ جت لحظة انكم تتكلموا، متستخدميش ايدك في التعبير عن كلامك غلط ...
28_ متشبكيش صوابعك، استرخي ...
29_ سيبيه يبدأ اسئلة، متبدأيش انتي اسمعي اكتر عشان تفهميه ...
30_ متخافيش وانتي بتجاوبي، مش هيديكي درجات وحشة ...
31_ الإنطباع الأول بيدوم، متحكيش عن الموضة هيعرف انك هايفة وبتدوري على بنك متنقل يدفع وبس ...
32_ متتكلميش عن صحباتك كتير وعن مغامراتكم ، عشان مياخدش انطباع انك مبتعمليش حاجة غير بمشورتهم ...
33_ كلميه عن هواياتك، ومدى ثقافتك، ابهريه بيكي ...
34_ متبصيش في ساعة الحيطة، المقابلة لسه بتبتدي ...
35_ جه دورك في الأسئلة، اسألي عن صلاته ودينه ...
36_ اسألي عن شغله، واوعي تسألي عن مرتبه او مادياته، هياخد انطباع عنك انك مادية ...
37_ اسألي عن اخواته واهله وشغلهم، عشان تطمني اذا فيه توافق اجتماعي او لا
38_ اسألي عن هواياته ...
39_ لو بص في ساعته او موبايله اعرفي انك فشلتي وعايز المقابلة تنتهي بأسرع ... شكل، ولو العكس وبحبح في الكلام وهزار وضحك اقولك مبروك ومتنسيش تعزميني ...
40 _ وفي نهاية المقابلة متسلميش بإيدك وابتسمي، وودعيهم لحد الباب ...
وربنا يتمم بخير
