البوست دا للي امتحاناتهم هتبقى في رمضان .... أوقات المذاكرة المثالية في رمضان----------------------------------الذكاء أنك تختار أكثر وقت يكون عقلك في حالة تركيز وانتباه عشان المذاكرة نشاط ذهني في الأساس ، عشان كدة جهزت لك نظام سهل هتلاقي نفسك بكل يسر ذاكرت من 8 إلى 10 ساعات وأنت في قمة الاستعداد البدني والذهني والروحي..الفترة الأولى المثالية : بعد صلاة العشاء وصلاة التراويح---------------------------------------------------- معروف إن الواحد بيحس بحالة خمول بعد الأكل مباشرة خصوصا لو تقل في الأكل ، نظام الأكل ده الموضوع القادم اللي هتكلم معاكم فيه إن شاء الله .طالما في خمول يبقى مفيش مذاكرة الافضل خصص الوقت بين المغرب والعشاء للجلوس مع الأهل والعيلة ، بعدين اتحرك على بركة الله على المسجد عشان تصلي العشاء والتراويح ، التراويح هتكون خير وبركة ليك مش هتصدق إزاي..أولا الصلاة هتنشط جسمك ويكون في حالة مثالية ، ثانيا هيضيع أثر الوخم والكسل اللي بعد الأكل ، أما الأجمل الاستماع للقرآن مع الخشوع هيغسل نفسك من كل السلبيات ، وفي السجود تدعي لنفسك وللمسلمين وللطلاب في كل مكان. هترجع وأنت في أفضل حالاتك وهتكون مذاكرة ممتعة. .هتذاكر من ساعتين لحد اربع ساعات مذاكرة بتركيز وبدون يشتتك ، أنت أديت عقلك كل شيء هو محتاجه روحانيات وأكسجين وحركة وهو هيرد لك الجميل ويديك مذاكرة محصلتش .وتقدر كمان تخلي الراحة اللي بتكون لمدة 5 دقيق بين فترات المذاكرة مخصصة لقراءة القرآن ، وتستشعر روعة الوقت والحسنات اللي بتكتب لك ، وتشعر بسعادة القدرة على الجمع بين العبادة والمذاكرة .بعد كدة نوم يا بطل لحد السحور ، وهتشوف ليه الخطوة دي مهمة جدا دلوقتي حالا فياريت تنتبه لها وتركز عليها .الفترة المثالية الثانية : ما بعد السحور------------------------------------في الفترة الأولى ذاكرت من ساعتين إلى أربع ساعات وبعدين نمت لحد السحور ، أو قبله بشوية لو عايز تصلي قبل الفجر ، بعد السحور وصلاة الفجر عايزك تجلس جلسة هادئة جميلة تقرأ فيها القرآن وتغسل نفسك وروحك عشان تستعد لفترة مذاكرة جديدة .الساعات اللي بعد السحور ساعات ذهبية مفيش فيها لا جوع ولا عطش ولا حر ، ولا فيها دوشة ولا تليفزيون ولا عزومات ، قدامك من 6 إلى 7 ساعات وقت تذاكر بهدوء لحد صلاة الظهر وبعدها تنام للعصر.. كدة هيكون صافي مذاكرتك في اليوم في رمضان من 8 إلى 10 ساعات .ميزة هامة إضافية لازم تنتبه لها ------------------------------لو مشيت على النظام ده مش هتضطر تغير نظام نومك في آخر كام يوم قبل الامتحان وطبعا أنت عارف إن الأيام اللي بتغير فيها نظام نومك بتضيع عشان مش بيكون عندك تركيز خالص ، كدة هيكون ذهنك صاحي ومنتبه في نفس الوقت اللي هتكون رايح فيه للامتحان .ملاحظة عملية هامة عشان الكلام ده يتنفذ------------------------------------------الكلام ده لو عايز تمشي عليه مش هينفع تبتدي تتعود عليه لما رمضان يبدأ ، عايزك لما ييجي رمضان تكون في القمة ، عشان كدة انوي خير وصوم الاثنين والخميس من شعبان والأيام القمرية عشان تعيش جو رمضان تماما ، وابدأ طبع النظام ده من دلوقتي. أهم حاجة أنك تخرج من رمضان فائز بالمغفرة والعتق من النار ، خلي ده هدفك الأهم والأكبر ، وأنوي المذاكرة عبادة لله وجهاد وإن شاء الله هيكون رمضان ده أجمل رمضان عدى عليك في حياتك كلها
هذا والله الموفق
هذا والله الموفق