#معلومه_بعد_الظهر
يعني ايه فتحه عدسه؟
- المصور بيتحكم فى فتحه العدسه حسب كميه الضوء اللى محتاجها فى الصوره وكمان العزل..
الرمز بتاع فتحه العدسه هو F ، فتحه العدسه هنا بتحدد مقدار الضوء اللى هيدخل للسينسور ، كل ما كانت الفتحه اكبر كل ما كميه الضوء كانت عاليه و العزل بصوره اكبر، و كل ماكانت فتحه العدسه ضيقه كل ما قلت كميه الضوء الداخل للسينسور و عمق الميدان يبقى كبير يعنى عزل قليل...
ازاى اختار الفتحة المناسبة فى تصويرى؟
- اختيار فتحه عدسه مناسبه بيعتمد على رؤيتك كمصور وايه اللى انت عايز توضحه فى الصوره، بس بشكل عام مصورين البورتريه بيحبوا فتحه العدسه الكبيره علشان عزلها القوى، بنلاحظ هنا كل ماكان رقم العدسه قليل كل ماكانت العدسه كويسه فى البورتريه، اما بقى فى تصوير المناظر الطبيعيه والغروب بيفضل فتحه عدسه ضيقه علشان عمق الميدان يبقى كبير علشان تفاصيل كتير تبقى جوه نطاق التركيز...
ايه دور حجم فتحه العدسه؟
- آخر حاجه حجم الفتحه بيلعب دور كبير فى سعر العدسه، يعنى كل ماكانت الفتحه واسعه كل ما سعر العدسه بيزيد، ميزه انك تشترى عدسه فتحتها واسعه هو انه بيبقى عندك التحكم الكامل انك تقلل او تزود ، اما بقى لما بتشترى عدسه فتحتها ضيقه دا بيقيدك و مبيخليش عندك الفرصه انك تصور باستخدام شاتر سريع في اضاءه ضعيفه او تعمل عزل قوي...
#معلومات_تصوير
#اتعلم_تصوير
#بيت_المصورين
#I_Learn#CPC