نصائح رمضانية 24 عشرون قاعدة يجب ان يكونوا في ذهنك

#نصائح_رمضانية
القواعد العشرين لرمضان ..

١_ افطر خفيف .. عشان تعرف تصلي التراويح ..وبعد التراويح كل اللي انت عايزه

٢_ تسحر متأخرا جدا .. ومتنساش موزاية وزباداية ( اوعى البيض)!

٣_ اختر مسجدا من الآن فيه إمام بيصلي بقلبه ويقرأ القرءان بقلبه وتدخل بدري وتصلي في الصف الأول..

٤_ لا تفتح التليفزيون..
وماتنشغلش بال trends كلها إعلانات مدفوعة لإجبارك على الرؤية عشان يشغلوك .. ولو الدنيا كلها بتتكلم اشغل بالك بالقرءان

٥_اشتري مصحف أو طلع مصحفك القديم عشان تختم فيه مرة واتنين و.. ١٠ لو ربنا كرمك .. واستعيد الذكريات يابطل..

٦_ ماتشغلش بالك لا امتى تخلص الورد أو السورة أو الختمة .. المهم تقرأ وتحاول تفهم المعنى ..

٧_ تحفظ من دلوقتى دعاء سجدة التلاوة ( سجد وجهي للذي خلقه ، وشق سمعه وبصره بحوله وقوته { فتبارك الله أحسن الخالقين } {" اللهم أكتب لي بها عندك أجراً ، وضع عني بها وزراً ، واجعلها لي عندك ذخراً ، وتقبلها مني كما تقبلتها من عبدك داود }

لازم تحفظه ( هيقابلك سجدات كتير سواء التروايح أو الختمات }

٨_لازلت عند رأيي ختمة واحدة بتدبر أعظم من مليون ختمة بلا تدبر .. وده ما يمنعش إنك تقرأ ختمات كتير وبتدبر أو محاولة فهم المعنى..

٩_ الصيام صوم عن كل المفطرات
أ. الطعام
ب. الشراب
ج. الشهوة
الشهوة أخطر من الطعام والشراب.. ولو ما كانش فيه فايدة من الصيام بتحصيل التقوى فماهي الفائدة؟؟

١٠_ أجر الصيام ربنا بس اللي يعلمه ( وده بيسميه العلماء الأجر العظيييييم ) ٣٠ يوم هتخليك في أعلى الجنان ..

١١ _ أمسك عليك لسانك إلا من الأذكار والقرءان والقول الحسن ..

١٢ _ النظر للمحرمات ليلا كالنظر للمحرمات نهارا ورب النهار هو رب الليل .. والشات المحرم في رمضان زي الشات المحرم في غير رمضان ..

١٣_ الشياطين كلها مصفدة ( مغلغلة ) أبواب الجنة متفتحة وأبواب النار مغلقة.. بالله عليك عايز إيه تاني ..
ياباغي الخير أقبل ياباغي الشر كفاية أبوس ايدك ( أقصر )

فرصة عظيمة تتعرف على نفسك بجد

١٤_ ناس كتيييييير بدأوا من رمضان وربنا فتح عليهم بعد كدة ... ونسأل الله أن يتوب علينا ..

١٥_ رمضان سريع جدا جدا جدا...وزي ما شيفين النهاردة 5 رمضان مفيش وقت للعب والانشغال ... قرءان وصلاة وذكر وجلسة مع الأحباب في مرضاة الله وصلة وبر و..و..و..

١٦ _ تصدق ولو بالقليل يوميا وخدلك أجر ولو صائم يوميا وشارك خير ولو بالقليل يوميا..

١٧_ شباب الدعوة وبنات الدعوة ياخدوا بالهم من الناس الليحابة تلتزم في رمضان بيبقى فيهم طاقة إيمانية وايجابية عجيبة .. استغلوا حياة القلب عندهم وعندهن ..

١٨_ بالله عليك إن كنت ستبتلى برؤية المحرمات أو الملهيات من مسلسلات وبرامج مقالب وغيره بالله عليك بالله عليك .. بالله عليك كمان مرة لا تنشر ذلك على صفحتك ولا تشاركه الناس .. ممكن تضل حد أو تشغل حد .. أو تضيع صيام حد .. الناس عندها فضول تعرف .. بس ماسكة نفسها .. أنت بتكون سبب في كدة وبتاخد وزرهم وبتضيع عليهم رمضان كمان ..
..
١٩ _ راعوا جيرانكم الأرامل والأيتام والفقراء وبلاش أفصل أنتم فاهمين ..

٢٠ _ في حاجة كلنا بنغفل عنها وهي ( كثرة الدعاء والمناجاة ) مش معنى إنك دعيت مع الشيخ في الصلاة يبقى خلاص!! لا الدعاء وقت السحر.. وقت الإفطار .. بعد الختمة .. بعد قراءةالقرءان .. وأنت ساجد والشيخ بقى مطول شوية .. قبل المغرب .. وماتنساش تدعو للمرضى في المستشفيات خصوصا السرطان ...
....
وأسأل الله أن يتقبل منا رمضان قيامه وصيامه وأن يبلغنا ليلة القدر أجرها وثوابها ..
والسلام ختام ..
دي تذكرة لي أولا ( ووالله أنا أحوج الناس بها ) ولك
اكتب اهم نقطه لفتت نظرك لو سمحت ليستفيد الجميع
تقبل الله منا ومنكم الصيام والقيام وصالح الأعمال
#تحياتي

شكراااااا